അടയാളം

***************

കാത്തിരിക്കുന്നവർക്ക് വേണ്ടി മാത്രം

ചിണുങ്ങിപെയ്യുന്നൊരു മഴ.

താളം ഉറപ്പില്ലാത്തൊരിടി വെട്ട്.

ഇലകളുടെ നെഞ്ചിൽ  പൊടിക്കുപ്പായം

അഴിഞ്ഞു മാറുന്ന നഗ്നത.

വായുവിലൊരു വെളിവ് .

ആകാശത്തിനു ശാന്തത.

അടക്കിപ്പിടിച്ച എന്തൊക്കെയോ

വിരൽ വിടവുകളിലൂടെ

ഉതിർന്നു പോയ തോന്നലിൽ

തറയിൽ പുല്നാമ്പുകളിൽ

മടിച്ചു നിൽക്കുന്ന  വെള്ളത്തുള്ളികൾ

തൊട്ടു ചികയുന്ന തണുപ്പ് .

മഞ്ഞു കാലം യാത്രാമൊഴിയുടെ

ആദ്യവരി മണ്ണിലെഴുതുകയാണ് .

വരാനിരിക്കുന്ന ഗ്രീഷ്മത്തിനെ

ഓർമിപ്പിക്കുകയാണ്.