അടയാളം

***************

കാത്തിരിക്കുന്നവർക്ക് വേണ്ടി മാത്രം

ചിണുങ്ങിപെയ്യുന്നൊരു മഴ.

താളം ഉറപ്പില്ലാത്തൊരിടി വെട്ട്.

ഇലകളുടെ നെഞ്ചിൽ  പൊടിക്കുപ്പായം

അഴിഞ്ഞു മാറുന്ന നഗ്നത.

വായുവിലൊരു വെളിവ് .

ആകാശത്തിനു ശാന്തത.

അടക്കിപ്പിടിച്ച എന്തൊക്കെയോ

വിരൽ വിടവുകളിലൂടെ

ഉതിർന്നു പോയ തോന്നലിൽ

തറയിൽ പുല്നാമ്പുകളിൽ

മടിച്ചു നിൽക്കുന്ന  വെള്ളത്തുള്ളികൾ

തൊട്ടു ചികയുന്ന തണുപ്പ് .

മഞ്ഞു കാലം യാത്രാമൊഴിയുടെ

ആദ്യവരി മണ്ണിലെഴുതുകയാണ് .

വരാനിരിക്കുന്ന ഗ്രീഷ്മത്തിനെ

ഓർമിപ്പിക്കുകയാണ്.

ലൈംഗികത
******************

വീണ്ടും വീണ്ടും നിന്നെ ആഗ്രഹിക്കുക എന്നതായിരുന്നു
എനിക്ക് ചെയ്യാൻ അറിയുമായിരുന്നത്.
നിന്നെ അറിയുക ,പിന്നെ
നിന്നിലൂടെ എന്നിലെത്തുക എന്നതും .

അതാണ് ഞാൻ ചെയ്തതും
ചെയ്തു ചെയ്തു തീർത്തതും.

നിന്റെ ഗന്ധത്തിനു തീയുടെ ലഹരിയുണ്ടായിരുന്നു.
നിന്റെ കരവലയം കാരിരുമ്പായിരുന്നു .
നിനക്ക് പകരം നീയില്ലായിരുന്നു.
എനിക്ക് പകരം ഞാൻ നിന്നെ കണ്ടെടുത്തു ,

ഋതുഭേദങ്ങളിൽ ഞാൻ നഷ്ടപ്പെട്ടു കൊണ്ടിരുന്നു.
രാപ്പകലുകളിൽ നീ വീണ്ടുമെന്നെ മെനഞ്ഞെടുത്തു .
കളിമണ്ണിന്‌ ജീവൻ വെയ്ക്കുകയായിരുന്നു .
ദാഹമോഹങ്ങളിൽ ,കാമത്തിൽ ,കാമനകളിൽ
കവിതകൾ എഴുതപ്പെടുകയായിരുന്നു ..

ഞാൻ സ്ത്രീത്വമായി പുനർജനിക്കുകയായിരുന്നു .
നീ പുരുഷനായി പരിണമിക്കുകയായിരുന്നു.

നാം നമ്മുടെ ആത്മകഥ എഴുതുകയായിരുന്നു...