ലൈംഗികത
******************
വീണ്ടും വീണ്ടും നിന്നെ ആഗ്രഹിക്കുക എന്നതായിരുന്നു
എനിക്ക് ചെയ്യാൻ അറിയുമായിരുന്നത്.
നിന്നെ അറിയുക ,പിന്നെ
നിന്നിലൂടെ എന്നിലെത്തുക എന്നതും .
അതാണ് ഞാൻ ചെയ്തതും
ചെയ്തു ചെയ്തു തീർത്തതും.
നിന്റെ ഗന്ധത്തിനു തീയുടെ ലഹരിയുണ്ടായിരുന്നു.
നിന്റെ കരവലയം കാരിരുമ്പായിരുന്നു .
നിനക്ക് പകരം നീയില്ലായിരുന്നു.
എനിക്ക് പകരം ഞാൻ നിന്നെ കണ്ടെടുത്തു ,
ഋതുഭേദങ്ങളിൽ ഞാൻ നഷ്ടപ്പെട്ടു കൊണ്ടിരുന്നു.
രാപ്പകലുകളിൽ നീ വീണ്ടുമെന്നെ മെനഞ്ഞെടുത്തു .
കളിമണ്ണിന് ജീവൻ വെയ്ക്കുകയായിരുന്നു .
ദാഹമോഹങ്ങളിൽ ,കാമത്തിൽ ,കാമനകളിൽ
കവിതകൾ എഴുതപ്പെടുകയായിരുന്നു ..
ഞാൻ സ്ത്രീത്വമായി പുനർജനിക്കുകയായിരുന്നു .
നീ പുരുഷനായി പരിണമിക്കുകയായിരുന്നു.
നാം നമ്മുടെ ആത്മകഥ എഴുതുകയായിരുന്നു...
No comments:
Post a Comment